Сельские нивы
+30 °С
Облачно
АНТИТЕРРОР
Все новости

КАРА ДЖИП

1 бүлекКөне буе эссе, бөркү үзәккә үтте бүген... Ниһаять, печәнгә нокта куйдылар Илдар белән әтисе.Соңгы печән өемен эскерткә куеп, эскертне каплап бетергәндә, озак көттергән яңгыр ява башлады. Башта нәзәкәтле итеп кенә яуды, аннан җилләп буранлап яуды... Ә тамчыларын эреләтергә барыбер ашыкмады яңгыр... Печәнчеләрнең эшләрен тәмамлауларын көтте булса кирәк...

КАРА ДЖИП
КАРА ДЖИП
Көне буе эссе, бөркү үзәккә үтте бүген... Ниһаять, печәнгә нокта куйдылар Илдар белән әтисе.
Соңгы печән өемен эскерткә куеп, эскертне каплап бетергәндә, озак көттергән яңгыр ява башлады. Башта нәзәкәтле итеп кенә яуды, аннан җилләп буранлап яуды... Ә тамчыларын эреләтергә барыбер ашыкмады яңгыр... Печәнчеләрнең эшләрен тәмамлауларын көтте булса кирәк...

Илдар мотоциклына атланды да, авылга элдертте. Әти кеше малаена карап, күздән югалганчы карап калды... Эх, яшьлек шул, бернишләп булмый, үз акылыңны да биреп була торган булмаган бит ә... Бирер иде, билләһи, бирер иде... Илдарның иләс - миләс чоры үткәнче түзәр иде әтисе ничек тә... Юк шул, һәркем дә бер егыла, йә бер абына бу тормышта. Кемгәдер файдага, ә кемгәдер кирегә китә ул сөртенү...

Илдар тиз генә мунчада юынды да, әнисенең "ашамадың" дигән тавышын да ишетми, Алсу янына йөгерде... Авылның уртасыннан агучы кечкенә генә су Алсу белән Илдарны аерып тора... Егет басмага керергә дип, аяк басуы булды, бөтен дөньяны челтерәтеп, ялтыратып яшен яшьнәп, күк күкрәде... Илдар яшеннән курыкмаса да, басмага баскан аяклары дерелдәп куйды... Иртәгә сөйгәне Алсу укырга китә. Казанга. Журналистика бүлегенә... Илдарга бик ошап бетми инде анысы...
Күңеле белән нишләптер җитди эш итеп күрми ул аны.
Авылда яшәсәләр кем булып эшләр микән Алсу... Авылда булмый кайда яшәсеннәр ди инде...

Илдар үзен белгәннән әтисе тирәсендә кайнашты. Әтисе белән гел кырда булды... Алсу белән дә шул кырда танышты бит инде ул беренче тапкыр...

Йә, Аллам! Чираттагы күк күкрәү, шундый ачулы күкрәү булды, янгырау тавышы әйтерсең, бөтен җир шарына таралды. Ул Алсуларның капка кыңгырауларына басты, ачучы булмады. Үч иткәндәй телефон юынган җирдә, мунчада калган... Дүрт өй аркылы гына яшәүче Ринасларның капка төпләреннән "выжт" итеп кара джип кузгалып китте... Тукта, Алсуның әнисе дә бар түгелме соң, кул болгаучылар арасында?! Илдар йөгреп түгел, очып үтте дүрт йорт арасын.
"Алсу.... Алсу кая?" - диде ул үрсәләнеп... "Алсу, Алсу "тю-тю", -
дип шаярды Алсуның туганы Ринас абзый...

...Илдар читкә китеп басты, аннан чүгәләп чирәмне йолкып алды, чирәмне өзгәләп, арлы - бирле йөрергә тотынды... Мондагыларның берсе белән дә сөйләшәсе килми иде. Әле моныңчы барлык туганнарын үз итеп йөргән Илдарга бар да чит, чит планетадан килгән кешеләр итеп кабул итте. Һәм шушы чит планета кешеләре арасыннан үзен аңларлык союздаш эзли башлады. Ә, әнә Алсуның апасы - Ләйлә, ул аны үзен тыңларлык, аңларлык бердәнбер кеше итеп күрде.

"Ләйлә, аңлат миңа, ялварып сорыйм, әле генә нинди спектакль булды монда? Алсу нигә миннән качып, берни әйтми китеп барды... Кем, кемнең машинасына утырып китте ул ",- дип учындагы йомарлап , өзгәләп бетергән чирәмне җиргә ыргытты. Хай, Илдар нигә шулай трагедия ясыйсың, Алсу бүген китте ни, иртәгә китте ни. Нәрсә үзгәрә шуннан?!. Әйе иртәгә китсә, сумкаларын күтәреп, автобуска өстерәлеп чыгар иде.
- Мин үзем автобуска утыртып җибәрә идем бит аны, - диде ул түбән карап.
- Ә Казанга килеп төшкәч нишләр иде ә?! И - и, җебегән дә инде шушы авыл малайлары , - диде дә тиз - тиз атлап өенә кайтып китте... Минут эчендә Алсуны озатучылар таралып та бетте. Сибәләп кенә явып торган яңгыр, җилләп үк яварга тотынды. Илдарның күңелендә өмет чаткысы уянды. Бәлки Алсу телефонына берәр нәрсә язгандыр дип өенә йөгерде.

Әнисе мунча суларын түгәргә кергәндә, Илдарның телефонын үзе белән өйгә алып чыгып куйды. Ике тапкыр Алсудан шалтыратуны күрсә дә алмады ана. Аласы килсә дә, улының күптән инде Алсу янына чыгып киткәнен әйтәсе килсә дә алмады әнисе түзде...

Менә Илдар да кайтып керде.
- Ник тизләдең улым, таң беленми бит әле, - дип, Илдарның күңелен күтәрмәкче булды...
- Әни, синнән яшермим инде, әтигә әйтмә зинһар, мин иртәгә Казанга китәм. Алсу артыннан. Бик сәер бу, минемчә түгел, аныңча да түгел. Башка кемдер идарә итә монда. Безне аерырга телиләр кебек миңа...

Шулвакыт йокы бүлмәсеннән әтисенең башы, аннан гәүдәсе күренде. Әнисе иренең башын, һәм карашын күрүгә, гәүдәсе чыкканчы ук кухня ягына китү ягын карады. Бүлмәдә тынлык урнашты...
- Иртәгә син Казанга түгел, кырга эшкә барасың, - диде әтисе. Ильдар сикереп торды:
- Әти, аңла, миңа Алсуны күрергә кирәк...Мин аны күреп сөйләшмичә, бер эш эшләрлек хәлдә түгелмен. Минем аңым томаланды.
- Юк. Бармыйсың! Алсу белән сезнең бер ни барып чыкмаячак...Аңла! Син - җир кешесе, ә ул кем...Сез бөтенләй туры килмисез. Тормышны тигез тарту, уңышка ирешү өчен, ир кешенең булачак хатыны бик зур роль уйный. Аңла шуны.
- Әти! - дип Илдар сикереп торды...Исмагыйль абый малаен урамга алып чыгып китте.

- Читкәрәк китик әле, әниең ишетмәсен...Син хәтирлисеңме Алсуны беренче тапкыр кайда күргәнеңне?...Кырда. Әнисе белән килгән иде. Әнисе ник минем янга килде дип уйлыйсың инде син?
- Белмим. Синең янга гел килделәр, син бөтен кешегә булышканга дип уйладым.
- Алсуның әнисе мине синнән , әниеңнән тартып алырга бик күп көч куйды. Без 9 класста укыганда ук бик бергә, аерылмас мәхәббәт кошлары идек. Безне барысы да ярәшелгәннәр дип йөртә иде. Әти - әниләр бер - берсенә " кода - кодагый" дип дәшә башлаганнар иде. Мине армияга алдылар һәм ни булды дип уйлыйсың?..
Илдар бер мәл әллә нишләп китте. Нәрсә сөйли, нәрсәгә ишарә ясый соң бу әти... Башы әйләнүдән Илдар җиргә чүкте. Ике як чигәсен кысып тотты. Шуннан сүзсез генә сикереп торды да, китәргә дип атлаган жиреннән туктап калды....
- Әти... Ә Алсу синең кызың түгелдер бит?.. Әтисе дәшмәде.
- Әти, әти дим, Алсу синең кызың түгел бит, түгел диген әти, түгел диген, ярма бәгъремне урталай. Әти, Алсу синең кызың түгел, түгел, түгел...

Кабат җиргә утырып чирәм утый башлады. Утамый, ә ике кулы белән, белештермичә ура, ураксыз ура иде ул чирәмнәрне... Бер ара тынлык урнашты...Төнге тынлык. Ата белән бала... әгәр өченче берәүдән сорасалар, "син кемне яклыйсың дисәләр, өченче кеше дәшмәс иде мөгаен, йөрәгенә кан савудан куркып, араларына кермәс иде... Әти кеше ике ут арасында калды. Әгәр Исмәгыйль улына дөресен әйтсә, Илдар шушы минутта төн уртасында Казанга чыгып китәчәк. Әгәр алдаса, улы китмәячәк, үзләре янында калачак... Ярты гасыр яшәп бер генә, бер генә алдарга ярыйдыр бит инде аңа да... Алдасам, кичерерсең бит инде Аллам дип, башын күтәреп күккә карады. Күк тыныч, йолдыз белән изгән, йолдыз белән баскан, йолдызларның эше беткән аларның... Нишләргә, нишләргә?
Исмәгыйль беренчесен сайлады... Улына дөресен әйтергә булды. Җирдә чирәмнән печән өеме ясап куйган улын кочаклап алды да, "Юк улым, Алсу минем кызым түгел", диде...
 
Рузилә Сафина

Дәвамы бар
Автор:Лилия Сайфутдинова
Читайте нас в